लाखनी : शेजारच्या घरी भाजी मागण्यासाठी गेलेल्या १३ वर्षीय अल्पवयीन मुलीवर ५० वर्षीय नराधमाने बळजबरीने अत्याचार केल्याची संतापजनक घटना लाखनी पोलीस ठाणे हद्दीत उघडकीस आली आहे. या पाशवी कृत्यामुळे पीडित मुलगी चार महिन्यांची गरोदर राहिली असून, लाखनी पोलिसांनी आरोपीविरुद्ध ‘पोक्सो’सह भारतीय न्याय संहितेच्या विविध कलमान्वये गुन्हा दाखल केला आहे. रतनलाल उर्फ जागेश्वर सुरचंद कुळमते (वय) असे आरोपीचे नाव आहे.
पोलीस सूत्रांनी दिलेल्या माहितीनुसार, डिसेंबर २०२५ मध्ये पीडिता आरोपी रतनलाल उर्फ जागेश्वर सुरचंद कुळमते (५०) याच्या घरी भाजी मागण्यासाठी गेली होती.पीडिता अल्पवयीन असल्याचे माहित असूनही, आरोपीने फायदा घेत तिच्यावर बळजबरीने अत्याचार केला. इतकेच नव्हे तर, याबाबत कुणाला काही सांगितल्यास तुला व तुझ्या आई-वडिलांना जीवे मारून टाकेन. अशी धमकी आरोपीने दिली होती.यामुळे पीडिता कमालीच्या दहशतीखाली होती.
दरम्यान, काही दिवसांपूर्वी पीडितेच्या प्रकृतीत बदल जाणवू लागल्याने कुटुंबियांनी तिची वैद्यकीय तपासणी केली. यावेळी ती चार महिन्यांची गरोदर असल्याचे डॉक्टरांनी सांगितले. या धक्क्यातून सावरल्यानंतर पीडितेच्या (४५) वर्षीय वडिलांनी दिलेल्या फिर्यादीवरून तसेच वैद्यकीय अहवालाच्या आधारे आरोपी रतनलाल कुळमते याच्याविरुद्ध लाखनी पोलिसांनी या प्रकरणाचे गांभीर्य ओळखून आरोपीविरुद्ध अपराध क्रमांक २७६/२०२६ अन्वये भारतीय न्याय संहिता कलम ६४ (१), ६५ (१), ३५१ (३) तसेच पोक्सो कायदा कलम ४ व ६ अंतर्गत गुन्हा दाखल केला आहे. या घटनेचा पुढील तपास पोलीस निरीक्षक सुभाष बारसे करीत आहेत.
