>>>चौफेर प्रतिनिधी | लाखनी
लाखनी | ग्रामीण रुग्णालयात नव्याने बांधण्यात आलेल्या प्रसूतिगृहाच्या व्हरांड्यात बांधकामातील त्रुटींमुळे पावसाळ्यात पाणी गळती होत असल्याने गंभीर समस्या निर्माण झाली आहे. गुळगुळीत टाइल्समुळे गरोदर महिला किंवा त्यांच्या नातेवाइकांचा पाय घसरण्याची आणि मोठी दुर्घटना घडण्याची भीती व्यक्त होत आहे. या गंभीर बाबीकडे रुग्णालय प्रशासनाचे लक्ष वेधण्याची गरज आहे. लाखनीला तालुका दर्जा मिळाल्याने येथील प्राथमिक आरोग्य केंद्राचे ग्रामीण रुग्णालयात रूपांतर झाले.
संपूर्ण तालुक्याला सेवा देणाऱ्या या रुग्णालयात उत्तम वैद्यकीय सुविधांमुळे प्रसूतीसाठी येणाऱ्या महिलांची संख्या लक्षणीय आहे. मात्र, पूर्वीच्या अपुऱ्या सुविधांमुळे प्रसूतीदरम्यान अडचणी येत होत्या. यावर उपाय म्हणून राष्ट्रीय ग्रामीण आरोग्य अभियानांतर्गत कोट्यवधी रुपये खर्चून नवीन प्रसूतिगृह बांधण्यात आले. बांधकाम पूर्ण होऊन प्रसूती कक्ष नव्या इमारतीत हलवण्यात आला. परंतु, जुनी आणि नवीन इमारत जोडणाऱ्या व्हरांड्याचे बांधकाम सदोष असल्याने छतातून पाणी गळते. याशिवाय, व्हरांड्यात लावलेल्या गुळगुळीत टाइल्समुळे घसरण्याचा धोका वाढला आहे.
दुर्घटनेचा धोका
पावसाळ्यात व्हरांड्यात पाणी साचल्याने स्वच्छता कर्मचारी रुग्णालयाच्या स्वच्छतेकडे दुर्लक्ष करून पाणी काढण्यात व्यस्त राहतात, असे विश्वसनीय सूत्रांनी सांगितले. अशा परिस्थितीत गरोदर महिलेचा पाय घसरण्याची किंवा अन्य दुर्घटना घडण्याची शक्यता नाकारता येत नाही. यापूर्वी अनेकदा दुरुस्ती करूनही पाणी गळतीचा प्रश्न कायम आहे. अशा परिस्थितीत एखादी दुर्घटना घडल्यास जबाबदारी कोणाची, असा प्रश्न उपस्थित होतो.
कंत्राटदाराच्या हलगर्जीपणाचा परिणाम
शासन ग्रामीण भागातील रुग्णांच्या आरोग्यासाठी सुविधा उपलब्ध करत असताना, कंत्राटदाराच्या हलगर्जीपणामुळे बांधकाम निकृष्ट होत आहे. लाखनीच्या या प्रसूतिगृहाच्या व्हरांड्याच्या बांधकामातील त्रुटींमुळे रुग्ण आणि त्यांच्या नातेवाइकांना त्रास सहन करावा लागत आहे. याबाबत स्थानिकांनी नाराजी व्यक्त केली असून, रुग्णालय प्रशासनाने तातडीने उपाययोजना कराव्यात, अशी मागणी होत आहे.
प्रशासनाचे मौन
या समस्येबाबत रुग्णालय प्रशासनाकडून अद्याप कोणतीही ठोस कारवाई झालेली नाही. पाणी गळती आणि सदोष बांधकामामुळे निर्माण होणारा धोका टाळण्यासाठी तात्काळ उपाययोजना करणे गरजेचे आहे. अन्यथा, भविष्यात मोठी दुर्घटना घडल्यास प्रशासनाला जबाबदार धरले जाईल.
