लाखनी : लग्नाचे आमिष दाखवून एका १७ वर्षीय अल्पवयीन मुलीवर अत्याचार केल्याची धक्कादायक घटना लाखनी पोलीस ठाण्याच्या हद्दीत उघडकीस आली आहे. याप्रकरणी पोलिसांनी तातडीने कारवाई करत नागपूर येथील आरोपीला अटक केली असून, त्याच्यावर ‘पोक्सो’सह विविध कलमान्वये गुन्हा दाखल केला आहे. वंश दीपक हुमणे (वय २१, रा. लोकमान्यनगर, नागपूर) असे अटक करण्यात आलेल्या आरोपीचे नाव आहे.
लाखनी तालुक्यातील एका गावातील १७ वर्षीय पीडित मुलीला आरोपीने लग्नाचे प्रलोभन दाखवले होते. दि. २४ मार्च २०२६ रोजी दुपारी १२:३० वाजेच्या सुमारास गडेगाव परिसरातील एका कॅफेमध्ये आरोपीने पीडितेच्या संमतीविना तिच्याशी बळजबरीने शारीरिक संबंध प्रस्थापित केले. काही दिवसांनंतर पीडितेच्या प्रकृतीत बदल जाणवू लागल्याने तिची वैद्यकीय तपासणी करण्यात आली. सिद्धिविनायक हॉस्पिटल, लाखनी येथील वैद्यकीय अहवालात पीडिता दोन महिन्यांची गरोदर असल्याचे निष्पन्न झाले. दरम्यान, हा प्रकार समोर येताच पीडितेच्या आईने लाखनी पोलीस ठाण्यात धाव घेऊन तक्रार दाखल केली.
पीडितेच्या आईच्या तक्रारीवरून लाखनी पोलिसांनी आरोपीविरुद्ध भारतीय न्याय संहिता कलम ६४(१) सह पोक्सो कायद्याच्या कलम ४ व ६ अंतर्गत गुन्हा दाखल केला. घटनेचे गांभीर्य ओळखून पोलीस निरीक्षक सुभाष बारसे यांच्या मार्गदर्शनाखाली पोलिसांनी तपासाची चक्रे फिरवून आरोपीला नागपूर येथून ताब्यात घेतले. या घटनेचा पुढील तपास पोलीस निरीक्षक सुभाष बारसे यांच्यासह पोलीस हवालदार अमितेश वडेटवार व पोलीस शिपाई प्रशांत धकाते करीत आहेत. आरोपी हा पीडितेचा नातेवाईक असल्याची माहिती समोर आली असून, या घटनेमुळे परिसरात खळबळ उडाली आहे.
